قبل ما ابدا القصة لازم تعرفوة ملخص الجزء الاول فى سطور بسيطة( الحكاية عن غابة كان الحمار هو الملك فيها وكانت عندة مشكلة انة حاسس ان الشعب تعبان ولما نزل يسأل الحيوانات عن اية اللى تعبهم محدش قال لية اى حاجة غير ان الوضع تمام التمام الا حيوان واحد وهو الفار الجريح ولما الفار قال للحمار عن راية بصراحة الحمار كالعادة مفهمش اى حاجة وامر بقتل الفار فى الحال) ودية كانت النهاية للجزء الاول والان اسمحولى لى ان اكتب الجزء التانى وارجوا ان تنال اعجبكم
بسم الله الرحمن الرحيم
بعد الحمار قرر اعدام الفأر الجريح اتاكد ان كل شىء فى البلد تمام التمام والكل عايش فى صحة وسلام فقرر انا يستريح شوية وينام ومرت الايام تجر وراها شهور وسنوات والحمار مستريح وحاتط فى بطنة طن برسيم وعلف كمان
وفى ليلة من ذات الايام شعر الحمار بتعب شديد فى كل جسمة مش قادر يتحرك ولايتكلم وياحولة الله مش قادر يتكلم ولاحتى يرفس ولا حتى رفسة واحدة.
طبعا الغابة اتقلبت الكل بتكلم عن صحة الحمار وعلى اللى ممكن يحصل لو مات واصبح فى خبر كان وكل الحيوانات بتقول معقول الحمار هيموت طب مين هيقدر يحكم ويبرطع وياخد الحق من الغلبان ويسامح القوى .
المهم
اجتمعت الوزارة فى الحال وقرروا انهم يحلوا المشكلة الخطيرة دية فى الحال ويختاروا نائب للحمار يحكم الغابة لحد ما الحماريرجع تانى او حتى يموت المهم ان الغابة تلاقى حد يحكمها عشان ماتعمش الفوضى بين الحيوانات وكمان عشان الغابات التانية ماتطمعش فى الغابة بتعتهم
وكانت المشكلة مين الشخصية اللى هتقدر تقوم بالدور الفظيع دا
اول حاجة فكروا فى الاسد على اساس يعنى انة قوى والحكم محتاج قوه وعزيمة جبارة بس الاسد اعتذر وقال انا مقدرش احكم غابة كان حكمها حمار .
وكان الاختيار التانى على الفيل بس الفيل كمان رفض وقال انا مقدرش اقبل الحكم ولما سألوة لية قال ليهم ان انة مش فاضى ومشغول جدا بكتابة مذاكراتى وكفاية عليا اكون وزير للعدل او المالية
ومبقاش فاضل ادمهم غير القرد ولما عرضوا علية الحكم قال ليهم ياجماعة يا رجال الحكم ياحكماء انتم تعبين نفسكم ومحتارين مع ان الحل ادمكم وانتم مش شيفين والحل ان ابن الحمار( الجحش) هو اللى يحكم الغابة واكيد هو وارث الحكمة والقوة والنزاهة من ابوة الحمار وكمان فى سبب تانى يخلينا نختار الجحش ومخترش غيرة وهو ان الحمار لسة عايش وممكن كمان يرجع ويحكم ولو اختارنا اى حيوان غير الجحش هنروح كلنا ورا الشمس .
الحقيقة ان كلام القرد كان منطقى جدا والكل وافق علية من غير اى معارضة او اعتراض.
بس كانت المشكلة ان الحجش ميعرفش اى حاجة عن الحكم كان طول النهار تلاقية ماشى فى الغابة يلطش فى خلق الله ومحدش طبعا قادر علية وكل همة انة يخزن البرسيم والعلف ويحرم الكل منة او يعمل اى سبوبة وياخد الارباح .
وطبعا الوزارة عارفة الكلام دا كويس جدا ففكروا انهم يحلوا المشكلة دية بأنهم يساعدوا الجحش ويفهموة اصول الحكم واول حاجة انة يتم تعينة الامين الرزين المتين ابو قلب حكيم وكرش سمين وعقل بهيم  واهو المنصب دا هيخلية فاهم اية اللى بيدور حولية
ومرت الايام وكل يوم الجحش يحاول انة يفهم حاجة جديدة لحد مابقى خلاص مية مية كل دا والحمار ياعينى نايم فى سريرة تعبان ومحدش بسأل فية.
لحد ماجت لحظة اعلان تتويج الجحش ملك الغابة وفجأة ظهر الحمار اللى كان تعبان وكانت صدمة للكل معقول الحمار رجع تانى ومش هيموت وفى وسط ذهول كل الحيوانات نطق الحمار وقال .
طبعا انتم مستغربين انى ادمكم بس انا مش عيزكم تستغربوا دا ربكم قادر على كل شىء طبعا هتقولوا انكم مغلطوش  عشان وقع اختياركم على الجحش بس دا ميهمنيش لانى معرفش ابويا ولا اخويا ولا حتى ابنى وطالما انا لسة عايش يبقى مش من حق حد يعين اى شخص تانى ملك عليكم حتى لو كان ابنى اللى من دمى واللى وارث حموريتى !!!!! والصراحة النهاردة بس فهمت كلام الفار اللى قالوا ليا من من كام سنة عارفين قالى اية؟

       ياعينى عليك يافار كلامة كان سليم ومليان فتامين قال وهو بيموت (ان الحيوانات اللى ترضى بحمار يحكمهم يبقوا يستهلوا كل اللى يجرى ليهم يامولاى والملك اللى بيصدق كلام اعوانة وميعرفش اى حاجة عن شعبة يبقى حمار)
انتم عارفين انا اتاكد دلوقتى انكم تستهلونى وانا استهلكم وعشان كدة انا امرت باعدام كل الوزرا ومن النهاردة مفيش الا الملك الحمار وبس ومن سعتها عرف اهل الغابة ان  مفيش حمار بيموت!!!!!!!!!!